Fri, 28 Feb 2020

Hiligaynon News: SSS ginbuksan ang calamity assistance package

Philippine Information Agency
22 Jan 2020, 10:38 GMT+10

SYUDAD SANG ILOILO, Enero 22 (PIA6) - - Mahimo na maka-avail ang mga miyembro kag pensyonado sang Social Security System nga naapektuhan sang bagyo nga si Ursula nagikan sa kabanwahanan sang Concepcion kag Carles sa probinsya sang Iloilo sang Calamity Assistance Package (CAP) nga ginbuksan sang ahensiya sining damlag lang.

Ginpahayag ni Amiel Yang Genova, Acting Senior Communication Analyst sang SSS West Visayas 2 Division nga ang ahensiya nagpain sang malapit sa P260 ka milyon nga pondo para sa loan package para sa mga kwalipikado nga miyembro kag pensyonado nga nagapuyo sa mga lugar nga gindeklarar sang National Disaster Risk Reduction and Management Council (NDRRMC) sa idalom sang state of calamity sa mga rehiyon sang Bisayas kag MIMAROPA tuga man sang kahalitan dala ni bagyo Ursula nga nag-igo sa sining mga lugar sang adlaw sang paskwa sang nagligad nga tuig.

Nalakip ang kabanwahanan sang Concepcion kag Carles sa mga lugar nga gindeklarar sang NDRRMC sa idalum sang state of calamity sa rehiyon sang Bisayas kalakip na ang iban pa nga mga lugar sa isla sang Panay kasubong sang Kalibo kag Malay sa probinsya sang Aklan, Libertad kag Pandan sa Antique kag Sigma sa Capiz.

Suno kay Genova ang mga kwalipikado nga SSS pensioners nga nagapuyo sa mga lugar nga apektado mahimo maka-avail sang abanse nga tatlo ka bulan nga pensyon sa idalum sang CAP.

Samtang ang mga regular nga nagabayad nga mga SSS member mahimo maka-avail sang calamity loan assistance kag Direct House Repair and Improvement Loan.

Gindugang ni Genova nga ang mga miyembro dapat may address sang puluy-an ukon propiedad sa mga lugar nga apektado agud mangin kwalipikado sa programa. Nakabayad man ini sila sang minimum nga 36 ka bulanan nga kontribusyon sa diin ang anum ang nabayaran sa sulod sang 1 ka bulan nga period bag-o ang petsa sang aplikasyon.

Kwalipikado sa direct house repair and improvement loan, amo ang mga aplikante nga indi magsobra sa 60 anyos kag may yara nga 24 ka bulan nga kontribusyon kon sa diin ang tatlo ka kontribusyon ang naremit sa sulod sang naulihi nga 12-month period bag-o ang bulan sang pag-file sang loan.

Ginsiling man ni Genova nga ang mga aplikante ang dapat magparehistro sa My.SSS facility sang ahensiya para makasulod sa programa. Pinaagi sini mapahunugutan ang SSS nga makagenerate sang billing sang aplikante sang nagakaigo ilabi na sa tion sang pagbayad agud ini ang automatiko nga ma-post sa idalum sa ila account.

Pagabatunon sang SSS ang mga aplikasyon sa CAP tubtub Abril 14, 2020 magluwas sa Direct House Repair and Improvement Loan nga magalawig tubtub isa ka tuig. (JSC/laf/PIA6-Iloilo)

More Malaysia News

Access More

Sign up for Malaysia News

a daily newsletter full of things to discuss over drinks.and the great thing is that it's on the house!